პირველი ეტაპი - სურსათის უვნებლობის ხელშეწყობა საზოგადოებრივ კვების ობიექტებში მონიტორინგისა და ადვოკატირების გზით

პროექტის მიზანი

ხელი შეუწყოს სურსათის უვნებლობის უზრუნველყოფას საზოგადოებრივ კვების ობიექტებში, შიდა ქართლისა და სამცხე-ჯავახეთის რეგიონებში, მონიტორინგისა და ადვოკატირების გზით.

პროექტის ამოცანები

1. გამოიკვლიოს და შეაფასოს რამდენად ეფექტურია სურსათის უვნებლობის მიმართულებით მოქმედი კანონი/რეგლამენტები და სურსათის ეროვნული სააგენტოს მუშაობის პროცესში არსებული გამოწვევები ბიზნესოპერატორების დარღვევებთან/შეუსაბამობებთან მიმართებაში;

2. კვლევის შედეგების გავრცელება და სურსათის უვნებლობის კონტროლის ეფექტურობის საკითხის ადვოკატირება.

 დაწყების თარიღი: 05.2022

 დასრულების თარიღი: 01.2023

 დონორი: საქართველოს სტრატეგიული კვლევებისა და განვითარების ცენტრი

 სამიზნე რეგიონი: შიდა ქართლი, სამცხე-ჯავახეთი

პროექტის ფარგლებში ასოციაციამ გამოიკვლია სამცხე-ჯავახეთსა და შიდა ქართლში მდებარე 500 საზოგადოებრივი კვების ობიექტის მდგომარეობა სურსათის უვნებლობის მხრივ, რომელზე დაყრდნობითაც შექმნა კვლევის ანგარიში და რეკომენდაციების დოკუმენტი. კვლევის ანგარიშში აღწერილია კვლევის შედეგები და ძირითადი მიგნებები: რამდენად იცავენ ბიზნეოპერატორები სურსათის უვნებლობის სტანდარტებს, რამდენად ეფექტურია სურსათის ეროვნული სააგენტოს მიერ კონტროლი და ამ მიმართულებით მოქმედი კანონი/რეგლამენტები, რამდენად სრულდება ევროკავშირსა და საქართველოს შორის ასოცირების შეთანხმების თავი 4 და დანართი IV-XII "სანიტარიული და ფიტოსანიტარიული ზომები". კვლევის შედეგებზე დაყრდნობით გაიცა 7 რეკომენდაცია, რომლებიც გამოვლენილი პრობლემების მოგვარებაზეა ორიენტირებული.

პროექტის თითოეული პირდაპირი ბენეფიციარის გამოწვევა/საჭიროება დაფიქსირდა კვლევის ანგარიშში და მომზადდა შესაბამის ორგანოსთან მიმართებაში რეკომენდაციები. მაგალითად, გამოიკვეთა ეთნიკური უმცირესობების (67 ბენეფიციარი) საჭიროებები, რომლებიც აისახა კვლევის ანგარიშისა და რეკომენდაციების დოკუმენტში. ბიზნესოპერატორებმა (105 ბენეფიციარი) განაცხადეს, რომ ინფორმაცია სურსათის უვნებლობის შესახებ არ არის ხელმისაწვდომი, ამ პრობლემის შესახებ შემუშავდა რეკომენდაცია და ა.შ. 

პროექტი განხორციელდა ‘საქართველოს სტრატეგიული კვლევებისა და განვითარების ცენტრის’ (CSRDG) მხარდაჭერით, ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში.

პროექტს ახორციელებდა კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად - საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP).